Evangelisch Reformierte Kirchgemeinde Mitlödi

Herbschtuusfluug ufä St.Margrethenberg

          vu dr Chilchgmeind Mitlödi

Ä Herbschttag so schüü……,

                   wiä d’Bletter tüänd lüüchtä, so herbschtlich und schüü

                                                           (Jodelliäd vu dr Miriam Schafroth)

Am Mändig 9.Oggtober schtartet dr vollpsetzt Niederer-Car vor äm Dorfladä Menzi,

z’Mitlödi, uf z’Namittag-Herbschtreisli vu dr Chilchgmeind Mitlödi.

Über Netschtel nuch ä Regäbogä und z’Wetter wirt immer schüüner….

Dr Rolf Rhyner het eimal mii, ganz ä schüüni Ruutäwahl troffä! Via Chirezer-alti Schtraass- über Land via Murg-Heiligchrüüz-Bad Ragaz- -vu hindä, d’Sarellischtraass/Luzibodä durä farbigä Herbschtwald uf Pfääfers- ufä St.Margreetäberg i z’Buura Beizli zu dr Famili Blöchlinger.

Nachäm Gruppäfotäli simmer gerä i z’heimäligä Buurä Beizli gu ä feins z’Veschperplättli mit hofeigätäm Salsiz,Schpegg, Moschtmöggli und guätem Chäs vu Tamiana-Alpä, gu gnüüssä.

De fein Crèmeschnittä het dä alles wunderbar abgrundet!

Bi Örgälikläng, bim singä und jodlä sind de einä verwiilet, de anderä sind gu salzigs,süässes oder glismets chräämä und de drittä sind bis i d’Jägeri hinderägschpaziärt.

Am füüfi heists wider Abschied nii und dr Heiweeg i z’Glarnerland aatrettä…

Herzlichä Dangg am Rolf Rhyner für z’sicherä, schüünä schoffiärä und d’Gegend erchläärä!

Am Susi, Hans, Laura, Romy Blöchlinger und am Andreas für de guät bewiirtig im Buura Beizli!

Dèr chalt Luft, wo bim iischtiigä vor dr Heireis um d’Ohrä plaast het, laat eim merggä äs isch Herbscht und s’gaht äm Winter entgegä!

Am 9.Dezämber isch im Mehrzweggruum z’Mitlödi dr Altersnamittag mit äm gmischtä Chor Mitlödi (Sänger/innä sind herzli willkommä) und am 17.12.17 um 17.00 isch d’Chinder-Jodel-Wiähnacht i dr Chilchä z’Mitlödi.                                                                                           

(eh)

 

2016 7 Kinderlager in Wildhaus